Twee lesse oor liefde

 

1 Johannes 3: 11-24

 

Daar is verskeie woorde in die Bybel wat gebruik word wanneer liefde teenoor iets of iemand verklaar word. Bybelskrywers het versigtig gekies om te sê wat hulle bedoel. Net in Grieks is daar ’n aantal woorde wat elk iets anders oor liefde sê. Dit is waarskynlik omdat Afrikaans ’n jong taal is dat ons arm is aan woorde om liefde mee uit te druk. Ons ken eintlik maar net die woordjie lief. Jy sal byvoorbeeld op een dag sê dat jy lief is vir jou vrou of man, en dan dieselfde woord gebruik om te vertel hoe lief jy vir jou hond is. Eintlik bedoel ons twee verskillende dinge, maar ons sê dit met dieselfde woord.

Miskien is die eerste les wat ons hieruit moet leer dat ons mooi moet dink voor ons sommer die woord lief gebruik. Wanneer ons goed nadink oor wat dit is wat ons wil sê en die bedoeling daarom beter oordra, sal ander werklik geliefd voel. Om lief te wees vir iemand is diep en spesiaal en verdien om reg gekommunikeer te word.

Uit 1 Johannes leer ons ’n tweede les. Dit is dat liefde, wat ons ook al daarmee bedoel, nooit net woorde of ’n gevoel kan wees nie. Liefde gaan altyd oor in dade. Dit geld vir ons liefde vir God en ons liefde vir ander. Die beste voorbeeld hiervan sien ons in Jesus se lewe. Sy liefde vir mense het tot sy dood gelei.

Kom ons gaan wees vandag lief deur noukeurig oor te dra wat ons bedoel en deur dade daarby te voeg. Dit gaan jou iets kos, maar ons doen dit graag omdat ons in die voetspore volg van Hom wat dieselfde vir ons gedoen het.

Gebed

Here, leer my om soos U lief te hê. Amen.

Ds Colin Hertzog

Middelburg-Noord